Адам баласы үшін Отан ол тек географиялық мекен емес, ол -кіндік қаны тамған, бабалар ізі қалған, рухани болмысы қалыптасқан қасиетті ұя. Ислам дінінде Отанға деген махаббат — жай ғана сезім емес, ол иманның кемелдігін көрсететін асыл құндылық. Халқымыздың «Отанды сүю – иманнан» деген нақылы осы терең ұғымды дөп басып тұр.

Пайғамбар өнегесі: Туған жерге деген сағыныш

Отанды сүюдің ең ұлы үлгісін біз ардақты Пайғамбарымыз Мұхаммед Мұстафаның (с.ғ.с.) өмірінен көреміз. Туған жері Меккеден амалсыз қоныс аударып бара жатқанда, ол кісінің: «Сен мен үшін сондай көркем әрі сүйіктісің! Егер халқың мені қуып шығармағанда, сенен басқа жерде тұрмас едім», – деп қимай қоштасуы – шынайы отансүйгіштіктің белгісі.

Тіпті Мәдинаға орныққан соң да, Пайғамбарымыз бен оның сахабалары Меккенің тауын, шөбі мен суын аңсап, сағынышпен еске алған. Бұл — адам табиғатына тән қасиет. Ислам діні бұл табиғи сезімді теріске шығармайды, керісінше оны сауапты амалдармен ұштастыруды бұйырады.

Отанның амандығы – діннің тыныштығы

Неліктен Отанды қорғау иманмен байланысты? Өйткені Отан тыныш болғанда ғана құлшылық еркін жасалады, ұрпақ тәрбиеленіп, рухани құндылықтар дамиды. Қасиетті Құранда адамның өз атамекенінен қуылуы — жанның тәннен ажырауымен тең ең ауыр сынақ ретінде сипатталған («Ниса» сүресі, 66-аят).

Дінімізде бес нәрсені: Отанды, дінді, жанды, малды және ар-намысты қорғау міндеттелген. Осы жолда қызмет ету -үлкен ғибадат. Хадистерде айтылғандай, ел шекарасын күзеткен адамның көзін тозақ оты шарпымайды және оның сауабы қияметке дейін тоқтамайды.

Бүгінгі күндегі Отан алдындағы борыш

Отанды сүю — құрғақ ұран емес, ол нақты іспен көрінуі тиіс. Қазіргі таңда бұл міндет бірнеше бағытта көрініс табады:

• Бірлік пен ынтымақ: «Бөлінгенді бөрі жейді» демекші, ел ішіне іріткі салатын жат идеялардан сақтанып, ауызбіршілікті сақтау.
• Адал қызмет: Өз ісінің нағыз маманы болу, мемлекеттің іргесін нығайтуға үлес қосу.
• Табиғатты аялау: Туған жердің өзен-көлін, тау-тасын таза ұстау — иманның бір бөлшегі. Жолда жатқан кедергіні алып тастаудың өзі садақа екенін ұмытпауымыз керек.
• Дұға ету: Ибраһим (а.с.) пайғамбардың жолымен: «Уа, Раббым! Бұл елді аман сақтай гөр!» – деп туған өлкеміздің тыныштығын тілеу.

       Отан — Алла Тағаланың бізге берген аманаты. Сол аманатқа қиянат жасамай, оны көздің қарашығындай сақтау — әрбір мұсылманның парызы. Бабаларымыз найзаның ұшымен, білектің күшімен қорғаған осы кең байтақ жерді біз бүгін біліммен, адал еңбекпен және имандылықпен көркейтуге тиіспіз. Еліміз аман, жұртымыз тыныш, тәуелсіздігіміз баянды болсын!